मस्को। गैरआवासीय नेपाली संघ राष्ट्रिय समन्वय समितिको विस्तारित बैठकले रूसमा रहेका सम्पूर्ण नेपालीहरूको तर्फबाट नेपालका पूर्वप्रधानमन्त्री एवं नेपाली कांग्रसका सभापति स्वर्गीय गिरिजाप्रसाद कोइरालाको निधनप्रति गहन शोक प्रकट गरेको छ ।
‘द्वन्द्वपीडित नेपालको नाजूक अवस्थामा समेत एकतन्त्रवादको विरोधमा नेपाली जनताको शान्तिपूर्ण आन्दोलनको नेतृत्व गर्दै सशस्त्र संघर्षमा संलग्न शक्तिहरूलाई समेत देशको आम राजनैतिक प्रवाहमा सरीक तुल्याएर जनआकांक्षाअनुरूप पूर्ण लोकतन्त्रको स्थापनामा दिवंगत गिरिजाप्रसाद कोइरालाबाट पुर्याइएको योगदान अविस्मरणीय रहने छ’ भनी श्रद्धाञ्जलि विज्ञप्तिमा अंशतः जनाइएको छ ।
नेपालका सबै राजनैनिक शक्तिहरूले सहमतिको माध्यमबाट समयमै नयाँ संविधान निर्माण गरी शान्तिप्रक्रियालाई तार्किक निष्कर्षमा पुर्याउनु नै दिवंगत गिरिजाप्रसाद केइरालाप्रति वास्तविक श्रद्धाञ्जलि हुनेछ भन्ने विश्वास जनाउँदै शोकसन्तप्त परिवारप्रति हार्दिक समवेदना प्रकट गरिएको उक्त श्रद्धाञ्जलि विज्ञप्तिमा पूर्वप्रधानमन्त्री एवं नेपाली कांग्रेसका सभापति गिरिजाप्रसाद कोइरालाको निधनबाट राष्ट्रकै निमित्त ठूलो क्षति पुग्न गएको महसुस गर्दै दिवंगत आत्माको चिरशान्तिको कामनासहित हार्दिक श्रद्धाञ्जलि अर्पण गरिएको छ ।
